موضوع: من اطلق الرصاص ع عمو محسن بتاع الفول الخميس ديسمبر 06, 2007 4:37 pm
أنا عايز أعرف بقى فيه كام واحد غَني في مصر؟؟ لا حضرتك.. مش الغِنَى العادي بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات اللي اربعة في اربعة يساوي ستاشر وحمامات السباحة والبودي جاردز اللى الواحد فيهم عضلة دِراعُه أتخَن من بطني لما آكل مَحشي
******* كام واحد غَنِى في مصر بقى؟؟ حضرتك السؤال ده منطقي جدا بعد الوجبة الدسمة من شلل الاطفال اللي شفناها في مسلسلات رمضان.. والحمد لله كلنا ختمناها وشدِّينا حيلنا كمان في العشر الأواخر أنا ماشفتش ولا مسلسل بصراحة إلا أول يوم رمضان عشان كنت في بيتنا.. المهم خير اللهم اجعله خير المسلسلات كلها عبارة عن عربيات شيروكي وبودي جاردز وحمامات سباحة ومجوهرات ودهب وياقوت واحمدك يارب والخلافات كلها ازاي الملياردير ده زعَّل الملياردير التاني.. فالملياردير التانى خسَّر الأولاني كام مليار.. وبعدين اتصالحوا في الآخر وكل ملياردير باس الملياردير التاني من بُقُّه والمسلسل خلص زى الفل والأخت نادية الجندي.. أخت إيه؟؟؟ نينة نادية الجندي صحفية شريفة أي وعهد الله وبتدافع عن الأخلاق وبتجري ورا الخبر والمستندات والصحف كلها واقفة على رِجْل أيوة حضرتك فين الكلام ده بقى؟؟ صحفية إيه اللي بتلفّ وتتعب وتتنكَّر وتتقتَل وتتخطَف عشان خبر ولاّ قضية فساد؟؟؟ كنتوا اكتبوا في تِتْر المسلسل بقى هذه الأحداث لا تمت للواقع بصلة وأي تشابه في أرض الواقع يبقى انتوا اللي هُبْل كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض.. وعدوّ النهاردة حبيب بُكرة.. مادام مرتب رئيس التحرير المعارض بيعَدِّي 35 ألف جنيه شهرياً ده غير نِسْبته من الإعلانات تبقى الحياة زي الفل ومفيش مشاكل ولا فساد
******* فكَّروني برضُه بأفلام خالد يوسف الأخيرة.. الأبطال كلهم أغنيا بالصلا ع النبي.. حتى البواب عنده هيونداي على قَدُّه.. ورايحين يتفسحوا في شاليه أي واحد فيهم ما كلهم عندهم شاليهات صلوا ع النبي وبعدين مالقوش حاجة يعملوها ولا يفكروا فيها قالوا يللاّ نلعب ويجا.. طب بالله عليكم حدّ كِدَه يقعد جنب موظف راجع من شغله في المترو .. ويقول له: لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك ولاّ العلاقات بين الجنسين.. دي بقى عايزة قعدة.. أي حد مذكر بيروح بيت أي حد مؤنث..والحد المؤنث عايش في بيت أي حد مذكر.. وطلع بالشيفروليه واحنا قاعدين.. وحَمِّل ع الشيفروليه واحنا قاعدين في فيلم وسط البلد محمد نجاتي بيقول لهند صبري تعالي معايا الشقة.. هند صبري بكل براءة وطُهْر قالت له: مفيش مشكلة.. أنا اعرف ان الواحدة تروح شقة الواحد تشرب شاي .. تقعد تتكلم شوية.. بس المشكلة ان الناس ممكن يفهموها غلط طبْ حدّ يجيب كوباية عصير قصب بقى للراجل اللي اتجنَّن ده يااخوانا اللى هوَّه أنا يعنى الواحدة تروح شقَّة الواحد تشرب شاي.. اتمَنَع الشاي من البلد ما عدا في شقة المحروس؟؟ وانا اللي عامل فيها مابحبِّش الشاي وعُمري ما شربتُه.. دا انا من بكرة هاشترى مخزون شهر من الشاي من جميع الأنواع
*******فين المسلسلات بتاعتنا احنا؟؟ احنا مش بنشوف الحاجات اللي بتحصل دى ياجدعان.. حد منكم شاف قصور وبودي جاردز وعربيات زي اللى بيحصل مع ابطال المسلسلات دي؟؟ واحدّ منكم شاف التحرُّر الرهيب ده بين أي بنت وولد في الحياة.. وان البنت تروح له البيت عادي؟؟ وبلاش نتكلم اكتر من كده عشان أنا حاطط وشِّي في الأرض دلوقتي ولو موجود يبقى كام في المِيَّة من سكان مصر المحروسة؟؟ يعنى مش عيب تبقى كل مسلسلات وأفلام مصر عن ناس احنا مانعرفهمش.. أو حتى عن نسبة لا تتجاوز واحد في المية من سكان بلدنا الحبيبة بتاعة مشربتش من نيلها؟؟ حد هيقول ده حسد؟؟ اقول له أيون حضرتك.. حسد وحقد وغلّ وكُرْه ومقت ونفسَنَة وما خَفِيَ كان أعظم فين عربية الفول وساندوتش الكبدة اللي برُبْع جنيه وتذكرة المترو والأتوبيسات الخنقة والموظفين الغلابة اللي فيه فتاوي قالت ان يجوز عليهم الزكاة.. والشباب اللي ع القهاوي؟ فين النت اللى عايزين يحدِّدوه زى النسل وفين مشاكل التأمينات والمعاشات؟ فين مشاكل الميَّة والزِّبالة اللي بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه فين مشكلة السَكَن والشباب اللي اتجوَّز على روحُه والبنات اللي بتشَمْشِم على عريس
*******مش هيَّه دي مصر؟؟؟ ولاّ مصر شوية صفقات وقصور وعربيات وبنات ستايل في الجامعة بأحدث موبايلات؟؟ ولا يعني ده عشان نفضل نقول ياريتنا زيّهم.. ونفضفض عن نفسنا شوية زي إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش في جَوْدة السَّمنة حضرتك.. المشكلة مين اللي هيجيب لك الأصناف دي؟؟ دي الفرخة عندنا بتتقسم على أربع ليالي.. والشوربة بنشرب فيها أسبوع وتلاقي الست الوالدة جايبة نفس نوع السَّمنة بس الفرخة مش زى اللي في التليفزيون الفرخة بتاعتنا م الآخر هيه فرخة لينا بتاعة مسرحية المتزوجون دي مش حياتنا؟؟ يا جماعة يعني واحد زى اللي قتل أمه من كام شهر عشان مش راضية تدّيله تلاتة جنيه ..لو شاف مسلسل زي بتاع نينة نادية الجندى والعيلة كلها عندها عربيات.. يعمل إيه؟؟؟ طب صحافة إيه ولا طبّ إيه ولا شغلانة إيه عموما اللي تجيب الفلوس دي كلها؟؟؟ طب حضرتك هما خرِّيجين آداب إنجليزى مش تبع الشغلانات دي يعني؟؟ حتى في الروايات البوليسية تلاقي كلمة السرّ دايما حاجة مش بتاعتنا.. يقول لك مثلاً: الثلوج تذوب دائما في الصيف يردّ عليه: ماعدا في القطب الشمالى وانا مالي بالقطب الشمالي ولا الجنوبي؟؟ ليه مَتِبْقاش كلمة السر مثلا: موبينيل رخَّصِت كل كروت الشحن يردّ عليه بفرحة: قُول وعَهد الله فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر
*******
متبقاش حاجه أقولها غير ان الموضوع منقوووول
Admin Admin
المساهمات : 379 تاريخ التسجيل : 03/10/2007 العمر : 41 الموقع : http://classiclove.multiply.com/
موضوع: رد: من اطلق الرصاص ع عمو محسن بتاع الفول الجمعة ديسمبر 07, 2007 9:31 am
بصراحة يا مودى الموضوع جامد
والله انا كنت باحسبه كوميدى وكان هيليق عنوان يوميات واحد مقهور مثلا
بس هو فعلا بيناقش قضايا كتير
لان فعلا التليفزيون بيستهبل اوى
هو فعلا فيه ناس بالوصف الاول والتانى فى الموضوع
بس الفرق ان اغلب الناس الاغنيا من ايام السادات وعبدالناصر كان البلد فيها فلوس وخير
مكنش فيه حرامية فى البلد من الاخر
وكان مهم جدا الشباب يشتغل ايامها اللى هما معاهم فلوس دلوقتى
وبما انهم اتعودو على فلوس كتير ايام زمان ودلوقتى لقو مفي شقالو يجارو العصر والنظام فى البلد ويلجؤا للسرقة
مش عارفة يعنى هو حظ الشباب الايام دى انهم وقعو فى البلد دى والا ايه
كده الحل اللى قدامهم السرقة زى الكبار بقى
هو عموما البلد فيها سلبيات اكتر من الايجابيات وياريتهم يدو الشباب فرصه يعمل حاجة
حتى الفرص مش متوفرة لهم
بس الموضوع ده كبير والكلا م فيه هيحبسنا
بس طبعا حسبى الله ونعم الوكيل فى اللى يستاهلها
وربنا يوفق ويعين اللى يستاهلها برضه
وبجد بجد ميرسى مووووت يا مودى
semsem
المساهمات : 104 تاريخ التسجيل : 06/10/2007
موضوع: رد: من اطلق الرصاص ع عمو محسن بتاع الفول الجمعة ديسمبر 07, 2007 9:49 am
no comment aw 3alashan 7^atrak ya assad la sama7 el laah laaaaa ta3leeeq
mody
المساهمات : 50 تاريخ التسجيل : 05/10/2007
موضوع: رد: من اطلق الرصاص ع عمو محسن بتاع الفول الجمعة ديسمبر 07, 2007 10:57 am
اولا شكرا يا دنيا على كلامك الرائع والاسلوب المتتاز فى الرد ممكن يعطييكى الحق فى الرد على توبيكاتى مره اخرى
اما بالنمسبه لهيثم وبما انى حذرته فى التوبيك الى قررت ادارتنا منحه لقب ........... اكمل
بطل يا ابنى تاخد ردودك كوبى بست
وانت بقا بالذات الى الخلف
Admin Admin
المساهمات : 379 تاريخ التسجيل : 03/10/2007 العمر : 41 الموقع : http://classiclove.multiply.com/
موضوع: رد: من اطلق الرصاص ع عمو محسن بتاع الفول الجمعة ديسمبر 07, 2007 11:02 am
ممكن يعطييكى الحق فى الرد على توبيكاتى مره اخرى
بتحرجنى بكرم اخلاقك يا مودى
mody
المساهمات : 50 تاريخ التسجيل : 05/10/2007
موضوع: رد: من اطلق الرصاص ع عمو محسن بتاع الفول الجمعة ديسمبر 07, 2007 11:14 am
الرئيسية 
البوابة 
أحدث الصور 
التسجيل 
دخول 
الخميس ديسمبر 06, 2007 4:37 pm
